ದಿಶಾಳ ಕವಿತೆಗಳು

ದಿಶಾ ಬರೆದ ಕವಿತೆಗಳು, ಹೆಣ್ಣಿನ ನೈಜ ಸಂಗೀತವೊಂದು ಕೇಳುತ್ತದೆ ಈ ಸಾಲುಗಳಲ್ಲಿ

ಅಲ್ಲೆಲ್ಲೊ ಮಣ್ಣಲ್ಲಿ ಬಿದ್ದು
ಒದ್ದಾಡುತ್ತಿದ್ದ ಬೀಜಕ್ಕೆ
ಮೊದಲ ಮಳೆಗೆ ಸಿಕ್ಕಿ
ಮೊಳಕೆಯೊಡೆದ ಸಂಭ್ರಮ.
*******************
ಯಾವ ಕೆರೆಯಲ್ಲೂ ಮುಳುಗದೆ
ಮುಂಗಾರಿನಲ್ಲೇ ಮೀಯುವೆ ಎಂದು
ಮಳೆ ಕೋಗಿಲೆ ಕಾಯುತ್ತಿತ್ತು
*******************
ದುಖಃವಾದಾಗ ಅತ್ತು ಬಿಡಿ
ಮಳೆ ಬಂದು ಹೋದ ಆಕಾಶ
ತಿಳಿಯಾಗಿರುತ್ತದೆ.
*******************
ಮೊದಲ ಮಳೆಗೆ
ಪರಿಮಳಿಸುವ
ಮಣ್ಣು ,
ಮೊದಲ ಪ್ರೀತಿಯಲ್ಲಿ
ಮುಳುಗಿದ
ಹೆಣ್ಣು ,
ಎರಡೂ ಒಂದೇ.
******************
ಬಿಸಿಲ ತುಣುಕೊಂದು
ಸಿಂಗರಿಸಿಕೊಳ್ಳಲು
ಮಳೆ  ಕನ್ನಡಿ ಹಿಡಿಯಿತು
ಬಿಸಿಲು ಮಳೆಬಿಲ್ಲಾಯಿತು.
*******************
ಗೊಸುಂಬೆಗಿಂತಲೂ ಬೇಗ
ಬಣ್ಣ ಬದಲಾಯಿಸುವ
ಸಂಜೆಯಾಕಾಶಕ್ಕೂ
ಹದಿ ವಯಸ್ಸಿನ ಮನಸ್ಸಿಗೂ
ಯಾವ ವ್ಯತ್ಯಾಸವಿಲ್ಲ.
*******************
ಗಾಳಿ ತಂಪಾಗಿದೆಯೆಂದು
ಎಲೆ ಚೊಟ್ಟು ಕಳಚಿಕೊಂಡರೆ
ನೆಲವೇ ಗತಿ.
*******************
ಭೂಮಿಯನ್ನು ಚುಂಬಿಸುವ
ಮೊಡದ ಬಯಕೆಗೆ
ನಡುವಿನ ಆಕಾಶ ಒದ್ದೆಯಾಯಿತು
********************
ಕರಿಮಣಿಯೆಂದರೆ ಅವನು ,
ಅವಳೆದೆಯ ಕನಸುಗಳನ್ನು
ಕದ್ದು ಪೋಣಿಸಿದ ಸರವಾಗಬೇಕು.

– ದಿಶಾ

Advertisements