Skip to content

ಕವಿತೆಯ ಬಲಿದಾನ

ಜುಲೈ 11, 2017

(ಕರ್ಮವೀರದಲ್ಲಿ ಪ್ರಕಟಿತ )

ಪದಗಳ ಬಟ್ಟೆ ಹಾಕಿದ ಕವಿತೆ,
ಹೊರಟಿತು ಕಾಲ್ನಡಿಗೆಯಲ್ಲಿ
ತನ್ನವರನ್ನು ಹುಡುಕುತ್ತಾ,

ಸಿಕ್ಕಿದವರು ಕೆಲವರು,
ಬಟ್ಟೆಯ ಅಂದ ನೋಡಿ ಬೆರಗಾದರು
ಬಣ್ಣ ನೋಡಿ ಆಶ್ಚರ್ಯಚಕಿತರಾದರು
ನೆಕ್ಕಲು ಪ್ರಯತ್ನಿಸಿ ರುಚಿ ಇಲ್ಲ ಎಂದರು
ಫೋಟೋ ಕ್ಲಿಕ್ಕಿಸಿ ವಾವ್ ಎಂದರು

ಆದರೆ
ಯಾರೂ ಕವಿತೆಯನ್ನು
ಬಾ ತನ್ನೊಳಗೆ ಎಂದು ಕರೆಯಲಿಲ್ಲ
ಬಾ ತನ್ನ ಆತ್ಮಕ್ಕೆ ಎಂದು ಸ್ವಾಗತಿಸಲಿಲ್ಲ.

ಆದರೂ ಸುಮ್ಮನಿರದ ಕವಿತೆ
ತನ್ನೊಳಗಿನ ಬೇಸರವನು ಹಂಚಲು ಪ್ರಯತ್ನಿಸಿತು
ತನ್ನ ದುಃಖವನ್ನು ಹೇಳಿಕೊಳ್ಳಲು ಮುಂದಾಯಿತು
ಅಯ್ಯೋ,
ನಾನು ಧರಿಸಿದ ಪದಗಳ ವಯ್ಯಾರ ನೋಡಬೇಡಿ
ನನ್ನ ಒಳಹೊಕ್ಕು ನೋಡಿ, ಬನ್ನಿ ನನ್ನನು ಪ್ರೇಮಿಸಿ,
ಎಷ್ಟೇ ಗೋಗರೆದರೂ ಯಾರೊಬ್ಬರೂ ಒಳಗಿಳಿಯಲಿಲ್ಲ

ಕವಿತೆಯ ಪ್ರಯತ್ನ ನಿಲ್ಲಲಿಲ್ಲ,
ಪದದ ಆರ್ಭಟದ ಎದುರು, ಭಾಷೆಯ ಕಟ್ಟುಪಾಡಿನ ಎದುರು
ನಿಂತು ಹೋರಾಡಲು ಪ್ರಯತ್ನಿಸಿತು,
ಬೇರೆ ಭಾಷೆಗೆ ಅನುವಾದಗೊಂಡಿತು,
ಆ ಭಾಷೆಯಲ್ಲೂ ಅದನ್ನು ಪದಗಳಲ್ಲಿಯೇ ಬಂದಿಸಲಾಗಿತ್ತು

ಎಲ್ಲಿ ಹೋದರೂ ಉಳಿಗಾಲವಿಲ್ಲ ಎಂದರಿತ ಕವಿತೆ
ಬರೆದವನಲ್ಲಿಗೆ ಹಿಂತಿರುಗಿ ಹೋಯಿತು,
ಅವನು ಆಗಲೇ ಸತ್ತಾಗಿತ್ತು.
ಕೊನೆಗೆ ತಾನು ಧರಿಸಿದ ಪದಗಳ ಬಟ್ಟೆಯನ್ನು ಕಳಚಿ
ಬೆತ್ತಲಾಯಿತು,
ತನ್ನಾತ್ಮವನ್ನು ಅರಿಯದೆ ಇದ್ದವರ ಎದುರು
ಆಕ್ರೋಶದಿಂದ ಚಿತೆಗೇರಿ ಸುಟ್ಟುಕೊಂಡಿತು.

ಹೆಣ್ಣೋಬ್ಬಳ ಹೆಣ ಚಿತೆಯಲ್ಲಿ ಸುಡುತ್ತಿತ್ತು
ಪುಟ್ಟ ಹೆಣ್ಣುಮಗಳು ಚಿತೆಯ ಪಕ್ಕ ನಿಂತು
ತಾನು ಭಯಗಳಿಂದ ಮುಕ್ತವಾಗಿ ಬದುಕಬೇಕು
ಎಂಬ ಶಪಥ ಮಾಡಿದಳು,
ಕವಿತೆಯ ಮುಖದಲ್ಲಿ ಕಿರುನಗೆ ಮೂಡಿತು.

Kaviteya balidaana

-ಜಿ.ಕೆ ನವೀನ್ ಕುಮಾರ್

Advertisements
ನಿಮ್ಮ ಟಿಪ್ಪಣಿ ಬರೆಯಿರಿ

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: